"أنت أنا"..."أنا انتي"

"أنت أنا"..."أنا انتي"

نوع من أنواع العلاقات سواء كان صداقة أو زواج أو غيره..اللى بيقرر فيها شخصين أنهم يستغنوا ببعض عن العالم كله ..يعزلوا بعض جوه دايره مقفوله عليهم لوحدهم ..والعالم كله بره الدايره دى..

النوع ده ممكن يبان للبعض أنه رومانسي و واو ومفيش بعد كده ..لكن في الحقيقة إن العلاقة دي مميتة مصيرها الموت ..هيجي وقت هيزهق واحد فيهم  ويقرر انه  يخرج بره الدايره دي ويسيب الشخص التاني لوحده بعد ماكان خلاص اتعود عليه ووقف حياته كلها عشانه..

شخص مبيعرفش يعمل حاجه لوحده ..مبعرفش يحزن لوحده ولا يفرح لوحده ..

متخيلين مقدار الأذى النفسي اللى ممكن يحصل لشخص زى ده كان الدنيا كلها عنده هى شخص واحد وسابه ومشى ..ممكن يوصل للجنون ..

علشان كده ...

ما تعزلوش نفسكم عن الأهل والصحاب والحبايب..

ما تستغنوش ببعض عن العالم..

مينفعش أي حد يكون هو المصدر الوحيد لكل حاجه.

مينفعش جوزك يبقى هو ربنا على الأرض..

مينفعش صاحبك يكون هو كل حياتك..

مينفعش والدك..والدتك..بنتك..ابنك.. يكون هو مصدر الأمان ليكي..

أنتم مش ملك حد ...ولا حد ملكك..

ده حتى ولادكم مش ملككم..

دول على رأي جبران ...أولاد الحياة.

افتحوا الدايرة .. يرحمكم الله

#علاقات_خطرة

-دكتور محمد طه